اسعار العملات بيتم تحديدها على اساس ايه ؟

العملة زيها زي اي سلعة بتتباع, بتغلى و بترخص على اساس بعض العوامل اهمها طبعاً العرض و الطلب.

بما ان اسعار العملات كلها حاليا بتتقاس مقابل الدولار, فنبدأ بالدولار.

الدولار مبدأش بنفس القوة دي, و قوته اكتسبها على مر السنين بعد ازمات كتير مر بيها, ففي سنة 1971 حصل تحول جذري في العالم كله في الجانب الاقتصادي على يد الرئيس الامريكي ريتشارد نيكسون, فهو قام بتعويم العملة الورقية, و كسر ارتباط الدولار بالذهب و بالتالي نظام بريتون وودز بقى غير قابل للتنفيذ, و من بعدها سعر الدولار بقى بيتحدد على اساس العرض و الطلب, و علشان تفهم اكثر دي بعض المفاهيم اللي لازم تعرفها :

• سعر الصرف :

هو عدد العملات النقدية من العملة المحلية اللي ممكن تبادلها مع العملات الاجنبية, و ده فيه نوعين :

سعر الصرف الاسمي :

و ده السعر اللي بتتم تبادل العملات بيه. و بيتحدد بطريقتين اما العرض و الطلب في السوق, او من خلال في البلاد اللي فيها رقابة على اسعار الصرف بيكون عن طريق قرارات السلطة النقدية.

سعر الصرف الحقيقي :

و هو ببساطة ايه اللي نقدر نشترية بعملتنا المحلية من سلع اجنبية, او بمعنى اخر القوة الشرائية الخارجية للعملة.

• قوة العرض و الطلب :

كل ما زادت الكمية المعروضة من العملات الورقية سعرها بينخفض, و العكس صحيح. فقوة العرض و الطلب هي اللي بتحدد سعر العملة المحلية مقابل الاجنبية, على سبيل المثال لو الطلب على الدولار مقابل الجنية اكبر من العرض فده بيتسبب في ارتفاع سعر الدولار مقابل الجنية و العكس, و ده وفقاُ لقانون الطلب.

• تعويم العملات الورقية :

 ده بيقصد بيه ان سعر صرف العملة المحلية مقابل العملة الاجنبية يكون محرر, يتم تحديدة في السوق على اساس العرض و الطلب فقط.

و للتعويم طريقتين

تعويم خالص : الدولة مش بتدخل ابداُ في تحديد سعر الصرف.

تعويم موجه : و ده بتتدخل فيه الدولة من خلال البنك المركزي و بتأثر على سعر الصرف من خلال تأثيرها على نسبة العرض و الطلب على العملات الاجنبية.

دي بعض المفاهيم اللي هتساعدك تتابع معانا قصة الدولار في البلوجز الجاية.

للمزيد من المعلومات سجل الان في IFRS Certificate لجمعية المحاسبين القانونيين المعتمدين ACCA المقدمه من hpa اول وكيل تعليمي ل ACCA في مصر و شمال افرقيا.