بيع بذكاء

البيع بشكل عادي هي مهنة بيشتغل فيها ناس كتير, و لكن مفهوم البيع بذكاء هو المهارة اللي بتفرق بين الموظف و المحترف في فن البيع.

طيب ايه هو مفهوم البيع بذكاء ؟

البيع بذكاء شئ مش صعب, هي مهارة بتعتمد على حاجة واحدة فقط و هي رضا العملاء, و رضا العملاء مش بس بيعتمد على المنتج اللي بتقدمه لكنه بيعتمد اكثر على تجربة المستخدم بشكل كامل علشان كدة تجربة المستخدم السلسة هي من الحاجات اللي لازم تركز عليها.

و في رسالته السنوية للمساهمين, قال Jeff Bezos, المدير التنفيذي لشركة امازون

“A remarkable customer experience starts with the heart, intuition, curiosity, play, guts, taste. You won’t find any of it in a survey.”

بيوضح ان تجربة المستخدم بتبدأ من القلب و ان العاطفة لها دور اساسي في عملية البيع, و التواصل مع العملاء المناسبين و البيع الذكي هما مزيج هيخليك تقدر تبيع بشكل احترافي, و علشان كده هنقولك اسرار البيع الذكي :

• اعرف الـUSP الخاص بيك:

الـUSP او Unique selling point لمنتجك هي عنصر التميز لمنتجك, و دي لو عرفتها هتسهل عليك اي مفاوضات مع العملاء, لأن عنصر التميز ده هو اللي من خلاله العميل بيعرف ايه هي الميزة اللي بتفرق منتجك عن كل المنتجات المنافسة و المشابهه ليه في السوق, سواء جودة او سعر او Option معين مش موجود غير في منتجك, استغل دايماُ نقطة تميز منتجك و بيع من خلالها.

• اختار العميل المناسب:

من اكبر الغلطات اللي بترتكبها الشركات و هي في البداية محاولتها لبيع المنتج لكل الناس, و ده مستحيل يحصل, دايما لازم يكون ليك جمهور محدد بتسوقله بالطريقة اللي تناسبه, و بتطور منتجك باستمرار على حسب احتياجاته, و بتبيعله بالاسلوب اللي يشده.

و علشان تحدد العملاء المناسبين ليك اتبع الخطوات دي :

حدد مشكلة

اللي بيواجهوا المشكلة دي “العملاء”

حل المشكلة “منتجك”

” علشان كده لازم تبيع المنتج للعملاء اللي عندهم مشكلة او احتياج منتجك هيسده مش لأي حد”

• Tell before you sell:

من قبل ما تبيع خلي العملاء المحتملين يعرفوا انت مين, و منتجك ده ايه قصته و بتقدمه ليه, ده هيساعد في نشر الوعي عن منتجك و هتحسسهم بأحتياجهم ليه, و وقتها هيكون البيع اسهل بكتير “ده طبعا لو المنتج فعلا كويس”.

• التزم بالرؤية المحدده للشركة:

بعض الشركات علشان هدفها هو البيع مع مرور الوقت بتفقد مسارها و بتحاول توصل لقاعدة عملاء اوسع, و ده بيشتتها و بيتسبب في فقدانها لعملائها الحاليين اصلا, فمن المهم الالتزام برؤية الشركة علشان تستمر.

خلي دايماُ هدفك هو ارضاء العملاء المناسبين عن طريق منتجك المناسب ليهم, و لو كان ده اسلوبك في البيع فـBravo انت كده بتبيع بذكاء.