الحياه بعد التخرج

الجملة دي دايماً بتبقي تقيلة علي اغلب الشباب, الشاب يبدأ يسأل نفسه انا هعمل ايه لما اتخرج ؟؟ هعمل ايه عشان ابقي مميز؟ هشتغل ايه وفأنهي مجال ؟

اسئله كتير وتفكير اكتر وتوهان فالمستقبل.

• فترة الجامعة :

فترة محاضرات وامتحانات وضغط دكاترة ودوامة بيتسحل فيها الطالب, ومع مرور سنه ورا سنه الطالب بيواجه شعور مختلط ما بين انه مبسوط انه هيتخرج وبين انه محتار هيبقي ايه وهيبدأ يشتغل علي نفسه ازاي عشان يقدر يتميز عن غيره في سوق العمل.

• فترة البحث عن العمل و” الانترفيوهات ” :

– بعد التخرج من الجامعة الشاب بيبدأ يدق كل الابواب سواء في مجاله او اي مجال تاني, وفي مننا اللي بيبقي محدد هو عاوز ايه بالظبط فا بيقصر الطريق علي نفسه ويبدأ يقدم فى مجال معين, وبرضه في مننا اللي بيبقي تايه عايز يشتغل اي حاجة لمجرد انه يبطل ياخد مصروف من اهله.

– بعد كدة بتيجي مرحلة الانترفيوهات والرعب اللي قبلها وخاصة الشباب اللي اول مرة تعمل انترفيو, الاحساس بالرهبة والتفكير في ان انا كويس ؟ طيب انا ممكن اتقبل ؟

– في مننا اللي بيتقبل علي طول وده حظه حلو وفي اللي بيفضل يعمل انترفيو فى شركة 2 و 3 وبرضه ميتقبلش وهنا الشاب بيبدأ يحس بأحباط وثقته بنفسه تقل

– اول يوم في بيئة العمل الشاب بيحس بأستغراب بسبب ناس جديدة اول مره يتعامل معاهم وقواعد وقوانين جديدة مش متعود عليها وده شئ طبيعي, ومع اول مشكلة في الشغل بتلاقي الشاب بيحن لايام الجامعة ويبدأ يقارن بين ايام الجامعة وايام الشغل, في مننا اللي بيبدأ يفكر انه يسيب الشغل او يسيب الـ “career  ” كله.

النصائح لكل الشباب اللي متخرج واللي لسه متخرجش :

• حدد اهدافك من وانت فى الجامعة.
• انزل Training كتير فى كذا مجال.
• ادخل “Student activities” من وانت فى الجامعة عشان تاخد خبرة التعامل مع الناس.
• خليك دايماً متفائل واوعي تحبط او تستسلم للظروف اتحدى نفسك وطور منها.
• ذاكر قبل اي انترفيو واقرأ كويس عن الشركة اللي رايحها وقبل كل ده خليك واثق من نفسك.
• ابعد عن اي حد ممكن يديلك طاقة سلبية وخليك ورا حلمك وهدفك.
• جرب وادخل كذا مجال عشان تعرف انت مكانك فين وكويس فأيه وكمان عشان تزيد خبرتك.
• اشتغل علي نفسك وخد كورسات في  مجالات مختلفة وادرس السوق وشوف محتاج ايه وايه اكتر مجال ممكن يخليك مميز