بيع 55% من فودافون مصر

[بيع 55% من فودافون مصر

في الفترة اللي فاتت سمعنا اخبار كتير عن بيع نسبة 55% من فودافون مصر لشركة الاتصالات السعودية STC, و في نفس الوقت كان في اخبار عن ان مجموعة فودافون بريطانيا سجلت خسائر في النصف الاول من السنه المالية اللي انتهت في سبتمبر 2019 بقيمة 7.8 مليار يورو مقابل ارباح 1.2 مليار يورو.

و  شركة فودافون العالمية مباعتش فودافون مصر بس, لكن باعت كمان فودافون مالطا لشركة موناكو تيليكوم, بالاضافة لبيع فودافون الهند و قطر و نيوزلندا, و كل ده كان رغبة من شركة فودافون الام في سداد مديونتها اللي وصلت لحوالي 14 مليار دولار بعد بيع حصتها في سوق الهند.

و في البيان اللي ارسله ناصر الناصر, رئيس مجموعة الاتصالات السعودية STC للبورصة السعودية اكد بالفعل ان الشركة بدأت في اجراءات الاستحواذ على فودافون مصر, و ان دخول STC للسوق المصرية في الفترة دي خطوة بتناسب استراتيجية النمو اللي بتطمح ليها شركة STC للحفاظ على موقعها الريادي في المنطقة العربية.

و هتستمر شركة فودافون في تواجدها على الساحة المصرية من خلال شركة فودافون للخدمات الدولية ) VOIS ), و بتسعى الشركتين فودافون و STC لعقد الاتفاقات النهائية بعد اكتمال الاجراءات و الحصول على الموافقات اللازمة من الجهات المسئولة و عم الفحص المالي النافي للجهالة على شركة فودافون مصر, و من المتوقع ان العملية البيع هتتم بالكامل في نهاية شهر يونيو 2020.

و بدأت فودافون تواجدها في مصر سنة 1998 بإسم كليك و استمرت في النجاح لحد ما وصلت لحوال 44 مليون عميل في مصر, بنسبة استحواذ 42% من السوق المصري, و بتتوزع ملكية شركة فودافون مصر الى 55% لشركة فودافون الام و 45% لشركة المصرية للاتصالات.

اما شركة STC السعودية فهي شركة وطنية لتقديم خدمات الاتصالات في سعودية بتماثل المصرية للاتصالات في مصر, و بيرجه تاريخ تأسيسها الى 9 سبتمبر سنة 2002 كشركة مساهمة سعودية, و حالياُ ملكية STC بتتوزع ما بين نسبة 70% لصندوق الاستثمارات العامة, و 16.23% اسهم حرة, و نسبة 7% للمؤسسة العامة للتأمينات الاجتماعية, و نسبة 6.77% للمؤسسة العامة للتقاعد.